BIG MAMA´S BLUES

Nýtt blogg.

Thu, 23 Feb 2012 11:36:32 GMT

Jæja ég er komin með aðra bloggsíðu;

http://blacktower101.com/bigmamablog/?p=1678

Geriði svo vel og fylgist með okkur þarna inná. Held áfram að blogga á meðan ég tóri.

Over and out.....

Fri, 17 Feb 2012 00:20:44 GMT

Þar sem blogcentral er búið að tilkynna lokun á bloggsvæðinu sé ég mig tilneydda til að hætta þessum kjaftavaðli hérna inná.

Það gæti verið að ég kæmi mér upp bloggi annars staðar, það er í vinnslu en ekkert tilbúið ennþá.

Verður auglýst síðar ef af því verður og vonandi áður en þeir slökkva alveg á þessu.

Ég þakka fyrir samfylgdina í gegnum árin.

Valentínusardagurinn.

Tue, 14 Feb 2012 08:04:30 GMT

Jæja þá er hann runninn upp enn og aftur þessi blessaði dagur elskendanna.

Ekki gerum við nú mikið úr þessum degi, en ég ætla nú samt sem áður að elda einhvern dýrindis rækjurétt handa mínum kalli í kvöld og það er allt og sumt.

Annars er allt við það sama, bara verið að vinna og sofa og svo framvegis. Það eru komnar myndir inní myndasöfn, af heimsókn Sillu og Ken til Mount Lavinia um liðna helgi.

Afmælin í dag

Mon, 13 Feb 2012 11:17:09 GMT

eru meðal annarra þessi:

Söngvarinn, ljóðskáldið og rithöfundurinn Tennesse Ernie Ford var fæddur árið 1919. Hann söng m.a. lagið fræga "Sixteen Tons" og hann lést 72 ára gamall.

Breski leikarinn Peter Gunn er fæddur árið 1963. Hann er núna með í þáttunum "Coronation Street".

Tónlistarmaðurinn Peter Gabriel sem var aðalsprautan í hljómsveitinni "Genesis" er 62 ára í dag.

Peter Tork sem gerði garðinn frægann í hljómsveitinni "The Monkees" er sjötugur í dag.

Sonur Michael Jackson, Prince Michael, er 15 ára í dag. Elizabeth Taylor var guðmóðir hans.

Söngvarinn Robbie Williams er 38 ára í dag.

Sjónvarpsmaðurinn Jerry Springer er fæddur í Englandi árið 1944 og lifir af því að sjokkera fólk með því að taka allskonar skrýtið fólk í viðtöl.

Leikarinn Joe Estevez er bróðir leikarans Martin Sheen og þar með föðurbróðir Charlie. Hann er fæddur árið 1946 og hefur aðallega verið með í svokölluðum B-myndum.

Sænska leikkonan Pernilla August sem var gift leikstjóranum Billie August, er fædd árið 1958.

Leikarinn George Segal sem ég man eftir úr hinni frábæru mynd "A Touch of Class" er fæddur á þessum degi árið 1934.

Leikkonan Kim Novak sem var stór stjarna hérna í denn, er fædd árið 1933 í Chicago.

Breski leikarinn Oliver Reed sem lék t.d. í myndinni um "Oliver Twist" fæddur árið 1938, en hann lést aðeins 61 árs að aldri.

Leikkonan Mena Suvari sem hefur verið með í "American Pie" myndunum og líka "American Beauty" er fædd árið 1979.

Afmælisbarni í dag er enginn önnur en leikkonan Stockard Channing eða "Rizzo" úr "Grease", en hún er fædd þennan dag árið 1944. Hún heitir réttu nafni Susan Williams Antonia Stockard, en þegar hún giftist fyrsta eiginmanni af fjórum, hélt hún eftirnafni hans Channing og sneri nafninu sínu við. Þess má geta að hún var 33 ára gömul þegar hún lék í "Grease".

Þrátt fyrir að hafa gifst fjórum sinnum, á hún engin börn. Hún hefur búið með kvikmyndatökumanni í mörg ár núna. Ein systir hennar er borgarstjóri Palm Beach.

Mánudagur.

Mon, 13 Feb 2012 02:42:22 GMT

Við erum aldeilis búin að hafa það gott yfir helgina.

Ég var nýkomin heim þegar bílstjórinn kom með þau Sillu og Ken á laugardeginum og fljótlega eftir það kom Gulli heim úr vinnunni.

Svo sátum við svolitla stund á svölunum og spjölluðum áður en við fórum að græja okkur út. Byrjum á að rölta aðeins á ströndinni og skoða fiskimennina og þeirra græjur sem eru vægast sagt frumstæðar.

Svo settumst við á stað og fengum okkur drykki og fórum svo að borða á "Hvíta Staðnum" svokallaða, en þar hanga vinnufélagarnir oft. Maturinn er mjög góður þar og við belgdum okkur út á ýmsum kræsingum.

Fórum heim eftir það og sátum frameftir nóttu útá veröndinni. Reyndar fór Ken snemma að sofa því hann hefur verið hálfslappur en við hin sátum lengi frameftir.

Sunnudagsmorguninn byrjaði á morgunverði á veröndinni og svo skelltum við okkur í gönguferð á ströndinni og enduðum í yndislegum bröns á Mount Lavinia Hótelinu.
Ég hef aldrei séð annað eins úrval og á þessu hlaðborði, það var allt sem þér getur dottið í hug og meira til.

Umhverfið er heldur ekki til að fúlsa yfir, glæsilegt svæði sem hótelið stendur á. Það koma myndir inná í kvöld vona ég.

En svo klikkaði bílstjórinn okkar á síðustu stundu, allt í einu vildi hann ekki keyra þau tilbaka til Negombo og við vorum í hálfgerðu brasi en þetta reddaðist nú allt saman. Svo vorum við bara að dorma það sem eftir leið dagsins og nú er bara venjuleg vinnuvika byrjuð.

Góða helgi allir!

Sat, 11 Feb 2012 08:20:42 GMT

Nú eru Silla og Ken á leiðinni, bílstjóranum seinkaði því það var víst svo mikil umferð á leiðinni og vegakerfið og umferðin hér er sko engu lík.

Þannig að ég fer bara heim og bílstjórinn kemur með þau beint uppí íbúð.

Hafiði það gott öll sömul!

Sönn ást??

Sat, 11 Feb 2012 08:18:43 GMT

Þrír menn sátu saman að drykkju á bar: lögfræðingur, læknir og mótorhjólagæji.

Læknirinn sötraði hvítvínið sitt og sagði: "Þegar konan mín á afmæli, ætla ég að gefa henni loðkápu og demantshring. Þanng að ef henni líkar ekki kápan, mun hun samt elska mig, því hún á líka demantshringinn."

Lögfræðingurinn sagði um leið og hann saup Manhattann drykkinn sinn: "Ég ætla að kaupa kjól hannaðan af einhverjum frægum og hún fær líka gullarmband, þegar hún á afmæli. Þannig að ef hún vill skila kjólnum, heldur hún armbandinu, þannig að ég verð í góðum málum."

Mótorhjólagæinn skellti í sig viskískoti og sagði: "Ég kaupi bol handa minni kellingu og dildó líka. Þannig að ef henni líkar ekki bolurinn getur hún bara farið í rassgatið á sjálfri sér."

Laugardagur

Sat, 11 Feb 2012 02:03:23 GMT

og við að vinna eins og venjulega. Í gærkvöldi hafði Marco kunningi okkar og vinnufélagi, sem er frá Portúgal, boðið nokkrum af okkur á Hvíta barinn svokallaða. Hann sagði að það væri alveg sérstakt tilefni og við yrðum öll að mæta.

Ég er nú ekki vön því að nenna svona löguðu á virkum dögum, en af því það var Marco sló ég til og skellti mér með.

Við vorum þarna nokkrir vinnufélagar og svo kom það í ljós að sonur Marco, Pedro sem býr í Portúgal, var þrítugur þennan dag. Hann langaði að halda uppá daginn og hringdi til sonarins og við sungum öll afmælissönginn í gegnum símann!

Við Guðlaugur fengum okkur bjór og rauðvín og fórum snemma heim en Marco sjálfur var sko í góðum gír og hélt áfram að djamma langt frameftir nóttu. Enda var hann smá framlágur í morgun þegar ég sá hann.

Sem betur fer er búið að fresta þessari kvöldvinnu hjá Guðlaugi fram yfir helgina, þannig að við eigum að geta átt góðar stundir með Sillu og Ken um helgina. Bílstjórinn sækir þau og svo reikna ég með að þau komi beint hingað og nái í mig og svo förum við heim.

Við vöknuðum klukkan hálfeitt í nótt við eigilega mikinn söng frá hóp manna sem hefur sjálfsagt setið niðrá einhverjum staðnum alveg beint fyrir neðan okkur. Einhver tromma spilaði undir og þetta var ansi mikill hávaði sem stóð nú ekki voðalega lengi yfir, sem betur fer.

Ég svaf bara ágætlega eftir það og er hin hressasta í dag. Ég er búin að fá nýja tölvu frá Danmörku og kemur tölvugaurinn núna á eftir til að tengja mig við kerfið, en þessi tölva sem ég er að vinna á núna, er alveg að gera mig brjálaða. Það er einhver fjandinn að henni, virðast einhver prógröm vanta og hún er svo lengi að það er alveg ferlegt.

Jæja, ætli maður verði ekki að koma sér að verki.

Drykkur dagsins.

Fri, 10 Feb 2012 09:26:20 GMT

Langaði að hafa drykk dagsins svolítið öðruvísi að þessu sinni og hann heitir:

FAT FROG

Innihald:

1 flaska Smirnoff ICE
1 flaska Bacardy Breezer (orange)
1 flaska WDB eða Original Blue Vodka

Takið tvö stór glös, hellið helmingnum af Smirnoff og Bacardy út í glösin og fyllið síðan upp með Blue Vodka og þá verður drykkurinn grænn. Setjið ís út í að vild og berið fram.

Föstudagur!

Fri, 10 Feb 2012 04:22:22 GMT

En hann er nú ekkert ægilega skemmtilegur, því við vinnum alltaf til klukkan sex hvern einasta andskotans föstudag............það er nefnilega enginn payday hérna eins og á Jamaica, því allir starfsmenn fá greitt í gegnum ráðningarskrifstofur.

Skrapp í verslun í gær til að kaupa ýmislegt í ísskápinn og svoleiðis, því þó við ætlum ekkert að elda um helgina, þá verðum við að eiga eitthvað til að narta í og bjóða gestunum uppá.

Ætlum að rölta á ströndina annað kvöld og velja einhvern huggulegan stað til að borða á með þeim Sillu og Ken.

Og ég svaf alveg hroðalega illa í nótt. Byrjaði á því að vakna klukkan hálfþrjú og fara á klósettið. Kveikti nú ekki ljós og ætlaði ekkert að lesa, því það dugar ekki, þá get ég ekki sofnað aftur. En þá fékk svona rosalegan krampa í kálfann og hoppaði um á einum fæti smá stund.

Þá fór ég að heyra í lestinni sem yfirleitt truflar mig ekki neitt, en þá vöknuðu greinilega gestirnir sem eru í næstu íbúð og þeir voru bröltandi fram og aftur, skellandi hurðum, sturtandi niður og ræskjandi sig. Það er ofboðslega hljóðbært þarna og var þetta að gera mig brjálaða.

Jæja, best að koma sér að verki.

Vikan líður svo hratt

Thu, 09 Feb 2012 03:47:26 GMT

nú er kominn fimmtudagur og alveg að koma helgi aftur.

Ég svaf bara óvenju vel í nótt, enda finn ég það líka hvað mér líður miklu betur og er hressari.

Í gær var komið heim í íbúð með heljarmikla efri hillu sem við létum smíða spes í eldhúsið, því það er vægast sagt skringilega útbúið. Engir efri skápar og voða lítið pláss yfirleitt, því þessi íbúð er leigð út í skemmri tíma til ferðamanna sem eru nú ekki mikið að stússast í eldhúsinu. En þetta kemur rosalega vel út, það var Marco vinnufélagi okkar frá Portúgal sem smíðaði þetta, en hann er þúsundþjalasmiður hérna á verkinu.

Við vorum búin að biðja húseigandann um að setja eitthvað upp þarna, en það vildi hann ekki og skaffaði okkur svona venjulega bókahillu sem við höfum verið að notast við. En þessi hilla sem Marco smíðaði er þess eðlis að henni er bara stillt uppá borðið og ekkert borað og ekki neitt, þannig að það sér ekki á neinu. Og það besta er að það eru ljós undir þessum skápum þannig að nú er loksins hægt að sjá til þarna.

Er bara orðið voða fínt þarna hjá okkur. En Gulli er nú alltaf að láta þessa tónlist sem stundum er spiluð þarna niðrá ströndinni, fara voðalega í taugarnar á sér. Ég finn ekki svo mikið fyrir því, en það er stundum þreytandi, en sem betur fer er það nú ekki oft.

Nú stendur til að hann fari að vinna einhverja kvöldvinnu, því það er verið að leggja einhver stór rör undir járnbrautarteina og það verður að ske á kvöldin. Ég er nú að vona að það trufli ekki heimsókn þeirra sæmdarhjóna Sillu og Kens sem eru að koma til okkar á laugardaginn.

Jæja, best að halda áfram.

Afmælin í dag

Wed, 08 Feb 2012 11:24:52 GMT

eru af mörg og misjöfn. Sjáið hér:

Söngvari hljómsveitarinn Mötley Crue, Vince Neil að nafni, er fæddur þennan dag árið 1961.

Rithöfundurinn Jules Verne, sem skrifaði m.a. "Umhverfis jörðina á 80 dögum" var fæddur á þessum degi árið 1828 og hann lést 77 ára að aldri.

John Grisham sem hefur skrifað margar metsölubækur sem hafa verið kvikmyndaðar, er 57 ára gamall í dag.

Leikarinn og fyrrum barnastjarnan Gary Coleman sem lést nú nýverið, var fæddur árið 1968.

Kvikmyndastjarnan Lana Turner var fædd árið 1921, en hún lést 74 ára gömul.

Leikkonan Brooke Adams sem er gift leikaranum Tony Shalhoub, fæddist þennan dag árið 1949.

Tónskáldið John Williams er áttræður í dag. Hann hefur gert tónlist við margar frægar kvikmyndir eins og "Schindlers List" og "Harry Potter".

Gamanleikarinn vinsæli Jack Lemmon var fæddur þennan dag árið 1925 en hann lést 76 ára gamall.

James Dean sem var aðal sjarmörinn hérna í denn, fæddist árið 1931 en hann lést aðeins 25 ára gamall, en náði samt heimsfrægð.

Leikkonan Mary Steenburgen er 59 ára í dag. Hún er gift leikaranum Ted Danson.

Leikarinn Seth Green, sem ég man helst eftir úr "Austin Powers ",myndunum er fæddur á þessum degi árið 1974.

Og þá er röðin komin að leikaranum og fyrrum sjarmörnum Nick Nolte sem má nú muna sinn fífil fegri. Hann sló eftirminnilega í gegn í þáttunum vinsælu "Rich man, Poor Man" þar sem hann lék á móti Peter Strauss. Núna heyrist helst af honum blindfullum og rugluðum út á strætum og torgum, en vonandi tekur hann sér tak.

Hann er 72 ára í dag.

Miðvikudagur

Wed, 08 Feb 2012 03:35:50 GMT

og ég svaf illa að venju. Finnst ég ekki hafa sofið heila nótt almennilega í langan, langan tíma.

Í gær var helgidagur hérna en við vorum nú að vinna. Á leiðinni heim keyrði ég framhjá musterinu og þar var múgur manna bæði fyrir innan og utan og mikill gangur í blómasölunni fyrir framan.

Þeir nota greinilega þessa poyadaga til tilbeiðslu þannig að það mætti varla sála af þessum innfæddu til vinnu í gær.

En Guðlaugur fór heim um eftirmiðdaginn og notaði tímann til að setja fullt af myndum inná bloggið hjá mér, þannig að endilega farið þangað inn og skoðið.

Afmælin í dag

Tue, 07 Feb 2012 08:40:31 GMT

eru m.a. þessi.

Danska klámstarnan Katja Kean er fædd þennan dag árið 1968. Hún heitir reyndar Sussie La Cour, réttu nafni.

Laura Ingalls Wilder sem flestir ættu nú að þekkja úr þáttunum "Grenjað á Gresjunni" var fædd á þessum degi árið 1867 og hún dó þegar hún var níræð að aldri.

Kántrísöngvarinn Garth Brooks er 51 árs í dag.

Rithöfundurinn Charles Dickens sem skrifaði um "Oliver Twist" var fæddur árið 1812 og hann lést aðeins 58 ára gamall.

Leikarinn Miguel Ferrer sem er sonur leikkonunnar Rosemary Clooney og þar með skyldur George, er fæddur árið 1955.

Eddie Izzard sem er leikari og hefur verið með sína eigin gamanþætti er fæddur árið 1962 í Yemen.

Breski leikarinn Pete Postelthwaite var fæddur árið 1946 og hann lést á síðsta ari. Hann var t.d. með í "The Usual Suspects".

James Spader sem er að gera garðinn frægan í þáttunum "The Office" er fæddur árið 1960.

Gamanleikarinn Chris Rock er fæddur árið 1965.

Aðalafmælisbarn dagsins er hinn nýfráskildi Ashton Kutcher en hann fæddist þennan dag árið 1978. Fyrir utan það að hafa verið giftur Demi Moore, er hann nýtekinn við hlutverki Charlie Sheen í þáttunum "Two and a half Men".

Í dag er svokallaður

Tue, 07 Feb 2012 01:57:40 GMT

poya dagur hér á Sri Lanka og það er yfirleitt almennur frídagur. En fáum við frí... sei sei nei. Núna sitjum við þrjú hérna á kontórnum (allir hvítir) hitt liðið er bara heima hjá sér.

Þetta er að klúðraðst sem framkvæmdastjórinn hafði planlagt, að allir ættu að vinna þessa daga og svo átti að safna þessum poya dögum saman og taka heila viku frí í apríl.

Þessir dagar fylgja fullu tungli og ég sá á leiðinni til vinnu, að Búdda musterið var alveg troðfullt, svona snemma morguns.

En jæja, Silla og Ken ætla að heiðra okkur með nærveru sinni um næstu helgi og ætlum við eitthvað að skrölta með þeim vítt og breytt um Mount Lavinia.